Home. Books. Businesses. Guest Book. History. Kids Zone. Location. Newyddion. Photos. Search. Ysgol.
Llyfr Newydd gan Mared Lewis -'Y Maison du Soleil'

Tŷ haf yn ardal Poitou-Charentes, Ffrainc, ydy’r Maison du Soleil. Bob haf ers saith mlynedd byddai criw o ffrindiau – Tim ac Esyllt, Ben a Cadi, Gareth a Non – yn cyrraedd y Maison yn un haid am bythefnos yn yr haul. Ond mae pethau’n wahanol y tro hwn.

Yn dilyn marwolaeth Esyllt, perchennog y tŷ, mae Tim ei gŵr yn penderfynu gwahodd y pedwar arall i dreulio haf arall yn y Maison. Ond nid pawb sy’n hapus o dderbyn gwahoddiad Tim. Gydag absenoldeb Esyllt fel cysgod dros y criw, mae gan bob un ei resymau dros deimlo’n anghyfforddus yn y tŷ ac yng nghwmni ei gilydd, er mai derbyn y gwahoddiad a mynd i Ffrainc y gwna pob un yn y pen draw.

Mae’r tensiwn yn y Maison yn amlwg, gyda phob aelod yn meddu ar gyfrinach, a’r awyrgylch o dwyll a drwgdeimlad yn dew drwy’r tŷ. Ond cynyddu wna’r tensiwn gyda’r newyddion y bydd llythyr gan Esyllt, a adawyd yn ei ewyllys, yn cyrraedd y Maison cyn diwedd y gwyliau, gan sicrhau fod Esyllt yn dal i reoli’r pethau, yn union fel pan oedd hi’n fyw.

Wrth i’r pum ffrind geisio dianc rhag presenoldeb Esyllt a’i gafael ar ei bywydau, a fydd modd iddynt ddod i delerau â’r gorffennol a symud ymlaen? Sut effaith gaiff y gwyliau ar y berthynas rhwng y pum ffrind? A beth fydd dyfodol y Maison du Soleil?

Dyma nofel afaelgar, sy’n delio â materion yn ymwneud â ffrindiau, cyfeillgarwch, cariadon, a thwyll. Mae’r stori’n frith o gyfrinachau a throeon, ac mae gan bob cymeriad rhywbeth i’w guddio. Ceir cipolwg i ddyfnderoedd personoliaeth y cymeriadau, eu hofnau a’u dyheadau, a’u barn am ei gilydd. Yma ceir darlun o gwlwm criw o ffrindiau sy’n datod yn sydyn ac yn amlwg wedi i’r un person oedd yn eu dal at ei gilydd farw. Mae tywydd hafaidd a gwres tanbaid lleoliad y nofel yn llifo o’r tudalennau, gyda disgrifiadau niferus o dirwedd Ffrainc. Dyma nofel a chydymaith addas iawn ar gyfer gwyliau haf.

ISBN 9780860742494 Publisher: Gwasg Gwynedd, Caernarfon.

[Click here to purchase... ] (site not associated with Llanddaniel.co.uk)
Y Maison du Soleil gan Mared Lewis Y Maison du Soleil gan Mared Lewis - Llanddaniel Next. Previous.